Ruvuma Yetu

KUELEKEA MAJIMBONI: HALI SIYO SALAMA KWA CCM MAJIMBO YA MBINGA, PERAMIHO

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

Jimbo la Peramiho ni eneo lote la Halmashauri ya Wilaya ya Songea, maarufu kwa jina la Songea Vijijini. Halmashauri hii inaundwa na kata 19, vijiji 74 na vitongoji 617 na kwa mujibu wa sensa ya watu na makazi ya mwaka 2012 hapa Peramiho kuna wakazi 173,821 wanaume wakiwa 86,548, wanawake 87,273 na kuna wastani wa watu wanne katika kila kaya.

Peramiho ni kati ya majimbo ambayo yalikuwa na vuguvugu la mabadiliko mwaka 1995 kwenye uchaguzi mkuu wa kwanza wa vyama vingi, japokuwa lilikuwa chini ukilinganisha na baadhi ya maeneo ya Ruvuma na mikoa jirani.

Vyama vinne vilijitokeza kuweka wagombea na dalili zilionyesha kuwa NCCR ndiyo ingekuwa tishio kubwa kwa CCM, bahati nzuri jambo hilo lilijiri pamoja na kuwa CCM haikuwa kwenye wakati mgumu sana.

Uamuzi wa wananchi kwenye masanduku ya kura yaliipa ushindi mkubwa kwa CCM na kuviacha vyama vingine vikiendelea kujifunza namna ya kupambana na chama hicho kikongwe siku za usoni.

Vyama vya Tadea na CUF vikiwasimamisha Yustin Liganga na Fulgence Kagaruki vilipata asilimia 2.2 ya kura zote kwa ujumla. Ally Madamba wa NCCR alijaribu kuvua asilimia 19.6 (kura 6,651) na Michael Mbilinyi wa CCM alichukua asilimia 78.2 (kura 26,539) na kuwa mbunge wa kwanza wa Peramiho chini ya mfumo wa vyama vingi.

Hata mwaka 2000 kwenye uchaguzi mkuu, Mbilinyi wa CCM ndiye aliibuka mshindi kwa mara ya pili, akiwaacha mbali wapinzani wake kutoka vyama vingine, akafanikiwa kuliongoza jimbo hili hadi mwaka 2005.

Ule uchaguzi wa “kimbunga” ulipowadia (mwaka 2005), CCM ilimuweka Mbilinyi pembeni na kumpa nafasi mwanamama machachari, Jenista Mhagama. Jenista hakuwa na kazi ya kutisha mwaka huo kwa sababu alikutana na wagombea wasio na mitandao mikubwa kutoka vyama vya Chadema, CUF na TLP. Mwisho wa siku mwanamama huyu aliwashinda kwa zaidi ya asilimia tisini ya kura zilizopigwa. Jenista alipata kura 46,480 (93.2%) huku vyama hivyo vitatu vikipata jumla ya asilimia 6.8 ya kura zote. Ndio tuseme, matokeo ya mwaka 2005 yalidhihirisha kuwa nguvu ya CCM imeimarika sana mwaka huo.

Matokeo mabaya kwa upinzani Peramiho yaliendelea mwaka 2010 wakati CCM iliposhinda kwa kishindo ikiwa tena na Jenista Mhagama. CCM ilichukua asilimia 89.43 (kura 28,782) na CUF, chama pekee kilichopambana na CCM kwenye uchaguzi huo, ikipata asilimia 8.21 (kura 2,642), mgombea akiwa ni Emmanuel Chilokota.

Katika uchaguzi wa serikali za mitaa uliofanyika mwezi Disemba 2014, Katika jimbo la Peramiho Chadema na CUF zilipata zaidi ya vijiji 31 tofauti na mwaka 2009 wakati viliopokuwa na chini ya vijiji 10.

Ndiyo kusema kuwa vyama vya upinzani vinazidi kujiimarusha kwenye jimbo hili, japo vikifanya hivyo polepole sana. Kwa maoni yangu, ushindani mkubwa wa kulisaka jimbo hili mwaka huu utakuwa ndani ya CCM ambako makada mbalimbali wa chama hicho wamezidi kujiimarisha wakiwa na nia ya wazi ya kumuondoa Jenista ambaye ni Waziri wa Nchi, Ofisi ya Waziri Mkuu (Sera na Utaratibu wa Bunge).

Pamoja na kuwa vyama vya Chadema na CUF vina wagombea wazuri, tatizo kubwa lipo kwenye mtandao wa chama kulinganisha na CCM ambayo ina mtandao thabiti mno wakiviacha mbali vyama vingine. Pamoja na hali hiyo, ukweli unabakia kwamba jimbo la Peramiho si zuri kwa CCM miaka michache ijayo na lina kila dalili kwamba litashika kasi ya mabadiliko baada ya mwaka huu.

Wilaya ya Mbinga

Mbinga ni moja kati ya wilaya sita za Mkoa wa Ruvuma.. Kwa ujumla, wilaya ya Mbinga ina kata 45, vijiji 165 na vitongoji 1,108 na kwa mujibu wa sensa ya watu na makazi ya mwaka 2012. Mbinga kuna wakazi 203,309, wanaume ni 96,347, wanawake 106,962 na wastani wa watu wanne katika kila kaya.

Wilaya hii inaundwa na majimbo mawili ya uchaguzi, jimbo la Mbinga Magharibi na Mbinga Mashariki.

Jimbo la Mbinga Magharibi

Kama vyama vya upinzani, hususan Chadema, Tadea na NCCR vingekuwa na mpango wa pamoja, labda jimbo hili lingechukuliwa na upinzani mwaka 1995. Katika uchaguzi huo, CCM ilimsimamisha Dkt. Luoga Thadeus ambaye alishinda kwa kupata kura 11,331 (63.5%) akifuatiwa na Michael Mahecha wa NCCR aliyepata kura 2,622 (14.7%) na Neema Masanche wa Tadea alishikilia nafasi ya tatu kwa kura 2,567 (14.4%), huku mgombea wa Chadema, Gray Maltaka akishika nafasi ya mwisho kwa kupata asilimia 7 ya kura zote.

Ukichunguza kwa umakini utagundua kuwa kwenye uchaguzi huu vyama vya upinzani vilipata takribani asilimia 40 ya kura zote, jambo lenye maana kuwa kama vingelikuwa vimeweka mgombea mmoja vingeweza kabisa kupata asilimia zaidi ya 51 kutokana na kupigiwa kura za wananchi wasiofanya maamuzi haraka.

Kwenye uchaguzi wa mwaka 2000 yale yale ya 1995 yakajirudia. Huku NCCR ikionekana kuyumba na kupoteza mwelekeo kutokana na migogoro isiyokwisha ndani ya chama hicho, Dkt. Luoga Thadeus alisimamishwa na CCM kwa mara ya pili na kuwashinda wapinzani. CCM iliendelea kuliongoza jimbo hili hadi mwaka 2005.

Aliyewahi kuwa mwimbaji maarufu wa kikundi cha sanaa za Jeshi la Wananchi wa Tanzania (JWTZ) wakati akiwa ofisa, Kepteni John Komba (sasa marehemu), ndiye alikuwa mgombea wa CCM kwenye uchaguzi wa mwaka 2005 hapa Mbinga Magharibi.

Komba aliendesha kampeni zake kisayansi akitumia vizuri ustadi wa sauti na nyimbo zake. Wananchi wa Mbinga wanasema watu walijazana kwenye mikutano yake mwaka 2005 kwa sababu walikuwa na fursa adimu ya kumuona ‘LIVE” akitumbuiza na kisha baadaye akiwaomba kura. Wakazi hao walimruhusu Komba awe kiongozi wao. Walimpigia kura 32,773 (91.1%). Washindani wake kutoka TLP, Tadea, CUF, NCCR na Chadema waliambulia asilimia 8.5 ya kura zote.

John Komba alitumikia kipindi chake cha kwanza cha ubunge akitumia sehemu kubwa ya muda wake kuzunguka na viongozi wa CCM katika mikutano mikubwa ya kitaifa ambako alikuwa anatumbuiza na kuvuta wasikilizaji wengi, na kwa mtindo huu CCM ilikuwa inajipatia wasikilizaji na huenda kufanikiwa kuwashawishi wengine waunge mkono chama hicho.

Mwaka 2010, CCM bado ilikuwa imara Mbinga Magharibi, japokuwa upinzani uliendelea kukua kiasi. Walau mwaka huo vyama vilijipunguza vyenyewe na kubakia vine, huku CCM ikitaka tena mbunge wake John Komba apewe kipindi cha pili, jambo lililowezekana. Katika uchaguzi wa mwaka 2010 walau walioweza “kuvuta soksi” na kuipa CCM presha kidogo ni Chadema. Hata hivyo chama hicho kilifanikiwa kuchukuu asilimia 10 tu ya kura za CCM tofauti na mwaka 2010 wakati CCM iliposhinda kwa zaidi ya asilimia 90.

Katika uchaguzi huo, Gilbert Jamesa Zannie wa Chadema alipata kura 3,613 (15.26) na kuwa mshindi wa pili huku Kepteni John Komba akiwa na kura 18,969 (80.11%). Safari ya John Komba kuwaongoza wana Mbinga Magharibi hadi mwaka 2015 iliishia katikati, miezi michache kabla ya uchaguzi mkuu wa mwaka huu 2015 alipofariki dunia.

Kabla ya kifo cha John Komba, niliambiwa kuwa ndani ya CCM hakukuwa na hofu ya kuporwa jimbo hili aidha na mtu mwingine zaidi ya Komba mwenyewe au mtu atokeaye upande wa upinzani. Kifo chake kimesababisha makada kadhaa wa CCM kuanza harakati za haraka tangu nyumbani kwake msibani Dar es Salaam hadi alipokwenda kuzikwa kijijini kwake ndani ya jimbo la Mbinga Magharibi.

Wanasiasa hao ndani ya CCM wanapambana kuwa karibu na familia ya Komba ili ikiwezekana, mmoja wa vijana wa John Komba ambaye alikuwa kipenzi cha baba yake aweze kuwaunga mkono na ikiwezekana kuwanadi ndani ya kura za maoni za CCM na hata kwa wananchi kwa kutumia ukuu wa jina la baba yake (marehemu) hapa jimboni.

Hata hivyo nilipowasiliana na kijana huyo sikumpata hewani hadi naamua kuchapisha uchambuzi huu. Lakini pia baadhi ya makada wa CCM wanaoishi Dar Es Salaam na wakiwa na nia ya kurithi viatu vya John Komba, wanasema kuwa huwenda mwanaye mmoja pia akaingia kwenye kinyang’anyiro cha kusaka ubunge ili kuendeleza sifa ya baba yake na labda kumalizia mipango ambayo alikuwa hajaikamilisha jimboni.

Vyama vya upinzani havikupata matokeo mazuri sana kwenye uchaguzi wa serikali za mitaa wa mwaka 2014 japokuwa vimefanikiwa kushinda vijiji na vitongoji vingi mno kushinda mwaka 2009. Pamoja na hayo, CCM bado ina nguvu ya kujivunia sana hapa Mbinga Magharibi na sioni kama kuna dalili ya upinzani kutwaa jimbo hilo, badaye Oktoba mwaka huu.

Jimbo la Mbinga Mashariki

CCM ilitumia vizuri mwanya wa uchanga wa vyama vya upinzani katika jimbo hili, mara mfumo wa vyama vingi ulipotangazwa kuanza rasmi na kufuatiwa na uchaguzi mkuu wa kwanza wa kitaifa mwaka 1995.

Kwenye uchaguzi huo, chama hicho kikongwe kilimuandaa kada wake mkongwe, Kanzolo Komba ambaye alipata bahati ya kukutana na wagombea wa upinzani ambao hawakuna uwezo wa rasilimali fedha wala uzoefu wa kutosha wa siasa za ndani ya nchi. Chama kilichoonekana kuwa na nguvu hapa Mbinga Mashariki ni NCCR na mgombea wake Ndemiwaka Ndunguru.

Kura zilipopigwa na matokeo kuwekwa hadharani, upinzani haukweza kupoka kiti cha ubunge. Kanzolo Komba wa CCM alishinda kwa kupata kura 29,348 (76.9%) akafuatiwa na Ndemiwaka Ndunguru wa NCCR aliyekuwa na kura 5,760 (15.1%) huku wagombea wa CUF na TADEA kwa pamoja wakipata asilimia 8.1 ya kura zote. Kanzolo aliingia kwenye historia ya kuwa mwanasiasa aliyeliongoza jimbo hili katika kipindi cha kwanza cha mageuzi ya kisiasa Tanzania.

Mwaka 2000 bado CCM iliendelea kujipanga huku NCCR ikiwa dhoofu. Ngwatura Ireneus ndiye alikuwa mgombea wa chama hicho kilichokuwa na mbunge hapa Mbinga Mashariki. Mgombea huyu alitumia faida ya kuparaganyika kwa upinzani na akafanikiwa kushinda kwa kura nyingi. Na ndiye ameingia katika rekodi kama mbunge wa pili wa CCM jimboni hapa, tangu kuanzishwa kwa mfumo wa vyama vingi.

Ilipofika mwaka 2005, taratibu za uteuzi ndani ya CCM ikiwemo kura ya maoni zilimbwaga Ngwatura Ireneus na kumpa nafasi kada mwingine wa chama hicho, Gaudence Kayombo. Baada ya Ireneus kukosa nafasi ya kuendeleza kipindi cha pili, alilalamika waziwazi kwamba amechezewa michezo michafu na viongozi wenzie akiwemo huyu Gaudence Kayombo aliyeshinda.

Kura za jumla zilipopigwa, Gaudence Kayombo wa CCM ndiye aliibuka mshindi wa kwanza dhidi ya wagombea kutoka vyama vya TLP, CUF na Chadema. Gaudence Kayombo alipata kura 82,277 (89.1%), akifuatiwa kwa mbali sana na mgombea wa Chadema, Masendi Lupogo Pancras aliyepata kura 7,520 (8.1%) huku Elzear Kawonga wa CUF akiambulia asilimia 1.8 ya kura zote.

Gaudence Kayombo alifanikiwa kuanza uongozi wa jimbo hili kwa maana ya mwakilishi wa wananchi na mshindani wake wa kisiasa ndani ya CCM, mbunge wa jimbo hili mwaka 2000 – 2005, Ngwatura Ireneus, alihamia Chadema na kuanza harakati za kusaka ushindi kupitia upinzani.

Ndiyo maana kwenye uchaguzi mkuu wa mwaka 2010 CCM ilitishika sana, naambiwa ikajipanga kwa hali na mali na viongozi wakubwa wakapelekwa kuweka sawa hali ya mambo. Hofu ya CCM ilikuwa kwamba chama hicho kinapambana na mgombea ambaye amewahi kuwa mbunge wa jimbo hili kwa miaka mitano na amewahi kuwa kada wa CCM kwa kipindi kirefu na kwa hiyo alitegemewa kuwa na ushawishi mkubwa ndani ya CCM na kwa wananchi kwa ujumla.

Mipango na mikakati ya CCM kumdhibiti kada wao wa zamani ambaye mwaka 2010 aligombea kwa tiketi ya Chadema, ilifanikiwa. Mpambano kati ya CCM na Chadema uliishia kwa CCM ikiongozwa na Gaudence Kayombo kupata ushindi wa asilimia 88.88 (kura 54,645) huku Chadema ikiwakilishwa na Ngwatura Ireneus, kupata asilimia 9.06 (kura 5,598). Matokeo haya yalimshangaza kila mwana Mbinga Mashariki kwa sababu yalikuwa mapambano ya vigogo kwa vigogo.

Lakini baadhi ya wananchi wanasema kuwa kulikuwa na dalili zote kuwa Ngwatura angeangushwa kwa sababu alipokuwa mbunge kupitia CCM (mwaka 2000 – 2005) hakufanya kazi kama ambavyo wananchi walitegemea na ndiyo maana hata CCM wenyewe wakamtosa kwenye taratibu za ndani ya chama chao.

Baadhi ananchi wa Mbinga Mashariki ambao nimewasiliana nao, wanasema kwamba mbunge wao amebadilika sana tangu apewe uongozi kwa mara ya pili mwaka 2010 na nilipowauliza ikiwa watamchagua tena, walianza kunitajia amajina ya makada mbalimbali wa chama hicho ambao wameonesha nia ya kusaka ubunge wa jimbo hili.

Hali hiyo inamaanisha kuwa Gaudence Kayombo anaweza kuangushwa kirahisi mno mwaka huu ndani ya kura za maoni za CCM. Hadi sasa, pamoja na juhudi kubwa za vyama vya upinzani kuongeza ushawishi kwa wananchi na kupata ushindi kwenye uchaguzi wa serikali za mitaa na kuwa na wagombea ubunge wazuri ambao hawajachujwa, naona sehemu kubwa ya wananchi inaongelea sana ushindani ndani ya CCM kuliko nje ya CCM.

Dalili hizo zinaweza kutufanya tuamini kuwa huwenda vyama vya upinzani vinaweza kukosa jambo kubwa la kujivunia kwenye Uchaguzi Mkuu wa mwaka huu katika jimbo hili. CCM bado iko imara sana Mbinga na kutahitajika miujiza ya upinzani kulitwaa jimbo hili kwa mipango ya muda mfupi kabla ya upigaji kura unaotarajiwa kufanywa miezi michache kutoka sasa.

Hitimisho

Jumatano ya wiki ijayo (Tarehe 27 Mei) tutamalizia mkoa huu kwa kuchambua majimbo ya Songea na Namtumbo na kisha, Jumamosi (Tarehe 30 Mei) tutahamia mkoa wa Mwanza na kuanza uchambuzi wa majimbo ya Nyamagana, Magu na Misungwi.

(Julius Mtatiro ni kiongozi mzoefu katika siasa. Ana shahada ya Uzamili ya Utawala na Uongozi (M.A), na ni mwanafunzi wa fani ya sheria (L LB): +255787536759, kuelekeamajimboni@yahoo.com – Uchambuzi huu ni maoni binafsi ya mwandishi).

Chanzo:Mwananchi

Waziri Nyalandu akagua meno ya Tembo yaliyokamatwa na askari wanyamapori wilayani Namtumbo

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

Waziri wa Maliasili na Utalii Mhe.Lazaro Nyalandu na Ofisa Wanyamapori akikagua ngozi za wanyamapori zilizokamatwa na askari wa wanyamapori toka kwa majangili Likuyu Sekamaganga Namtumbo mkoani Ruvuma mwishoni mwa wiki iliyopita.

Waziri wa Maliasili na Utalii Mhe.Lazaro Nyalandu na Ofisa Wanyamapori akikagua meno ya tembo yaliyokamtwa na askari wa wanyamapori toka kwa majangili Likuyu Sekamaganga Namtumbo mkoani Ruvuma mwishoni mwa wiki iliyopita.

Waziri wa Maliasili na Utalii Mhe.Lazaro Nyalandu akila chakula cha mchana na wanafunzi wa shule ya sekondari ya Selous iliyopo Likuyu wilayani Namtumbo mkoani Ruvuma mwishoni mwa wiki iliyopita.

UZINDUZI WA MBIO ZA MWENGE SONGEA MKOANI RUVUMA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

Rais wa Zanzibar na Mwenyekiti wa Baraza la Mapinduzi Mhe. Dkt. Ali Mohamed Shein akiwasha Mwenge wa uhuru leo mjini Songea katika Uwanja wa Majimaji ikiwa ni sehemu ya sherehe za uzinduzi wa mbio za Mwenge kwa mwaka 2015

Rais wa Zanzibar na Mwenyekiti wa Baraza la Mapinduzi Mhe. Dkt. Ali Mohamed Shein akihotubia leo mjini Songea wakati wa sherehe za uzinduzi wa Mbio za Mwenge wa uhuru zilizofanyika kitaifa mkoani Ruvuma.

Rais wa Zanzibar na Mwenyekiti wa Baraza la Mapinduzi Mhe. Dkt. Ali Mohamed Shein (kushoto)akimkabidhi Kiongozi wa Wakimbiza Mwenge Kitaifa Juma Khatibu Chum (kulia) Mwenge wa uhuru leo mjini Songea baada ya uzinduzi wa mbio hizo Kitaifa mkoani Ruvuma.

Kiongozi wa Mbio za Mwenge kwa mwaka 2015 Juma Khatibu Chum(kushoto) akimkabidhi Mkuu wa Mkoa wa Ruvuma Said Mwambungu(kulia) Mwenge wa uhuru leo mjini Songea baada ya uzinduzi wa mbio hizo Kitaifa mkoani Ruvuma.

Mkuu wa Mkoa wa Ruvuma Said Mwambungu(kushoto) akimkabidhi Mkuu wa Wilaya ya Songea Profesa Norman Sigalla King(kulia) Mwenge wa Uhuru uhuru kwa ajili ya kuanza mbio wilayani humo baada ya uzinduzi ulifanywa leo mjini Songea na Rais wa Zanzibar na Mwenyekiti wa Baraza la Mapinduzi Mhe. Dkt. Ali Mohamed Shein akihotubia leo mjini Songea.

Wananchi wa Mji wa Songea na Vijiji jirani na Mjihuo wakiwa katika uwanja wa Majimaji Mkoa wa Ruvuma kushuhudia uzinduzi wa mbio za Mwenge wa Uhuru Kitaifa uliowashwa na Rais wa Zanzibar na Mwenyekiti wa Baraza la Mapinduzi Dk.Ali Mohamed Shein

Maafisa mbali mbali wakiwa katika uzinduzi wa Mbio za mwenge kitaifa uliofanywa na Rais wa Zanzibar na Mwenyekiti wa Baraza la Mapinduzi Dk.Ali Mohamed Shein leo katika Uwanja wa Majimaji Songea Mkoa wa Ruvuma

NAIBU WAZIRI WA MAJI MH AMOS MAKALLA AZINDUA MRADI MKUBWA WA MAJI KIJIJI CHA MKONGO NAKAWALE

Naibu Waziri wa Maji Mh. Amos Makalla akisalimiana na watumishi wa Halmashauri ya Wilaya ya Namtumbo, kushoto kwake ni Mkuu wa Wilaya ya Namtumbo Bi. Agnes Hokororo.

Naibu Waziri wa Maji, Mh Amos Makalla amefanya ziara ya kikazi wilaya ya Namtumbo pamoja na mambo mengine amezindua mradi mkubwa Maji kijiji cha Mkongo Nakawale ambao watu zaidi ya 4000 wanapata Maji safi.

Aidha amekagua mradi wa Maji Milonji na ametoa agizo hadi kufikia tarehe 12 mei mwaka huu mkandarasi awe amekamilisha kuchimba kisima kingine baada kisima cha awali kuwa na Maji machache.

Pia Mh Makalla amemwagiza Katibu mkuu wizara ya Maji kuunda kikosi kazi cha watalaam kwenda Namtumbo kufuatilia matumizi ya Fedha kwa miradi ya Maji wilaya ya Namtumbo.

Naibu Waziri wa Maji Mh. Amos Makalla akisalimia watumishi wa Halmashauri ya Wilaya ya Namtumbo mara baada ya kuwasili Namtumbo kukagua na kuzindua miradi ya maji wilayani Namtumbo. Kushoto kwa Naibu Waziri ni Mkuu wa Wilaya Bi. Agnes Hokororo.

Naibu waziri wa Maji Mh. Amos Makalla akifungua maji katika moja ya vituo vya kuchotea maji bara baada ya uzinduzi wa mradi wa maji katika kijiji cha Nakawale kilichopo Namtumbo mkoani Ruvuma.

Naibu Waziri wa Maji Mh. Amos Makalla akiwa na Mbunge wa Namtumbo Mh. Vitta Kawawa wakiashiria kuzinduliwa kwa mradi wa maji wa kijiji cha Nakawale.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

KAMPUNI ZISIZOSAJILIWA SOKO LA HISA KUBANWA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

SERIKALI imesema katika siku zijazo haitoruhusu kampuni yoyote isiyosajiliwa katika Soko la Hisa kutolipa kodi na hata kutiliwa shaka kwamba shughuli zifanywazo haziko katika hali ya uwazi.

Naibu Waziri wa Fedha, Mwigulu Nchemba alisema hayo Dar es Salaam na kuongeza kuwa ni vyema wamiliki wa kampuni mbalimbali nchini wakajiandaa kisaikolojia na kuhakikisha kampuni zao zinaandikishwa katika Soko la Hisa ili kuwezesha jamii kutambua kazi wazifanyazo kuwa ni za uwazi na zenye manufaa kwao.

“Kampuni mbalimbali…mtengeneze utaratibu wa kuingia katika Soko la Hisa Tanzania ili kuwezesha wananchi kiuchumi na pia kuondoa dhana kuwa mnaendesha shughuli zenu kwa usiri mkubwa,” alisema Nchemba.

Alisema Taifa linakokwenda si tu halitoruhusu kampuni kutolipa kodi bali hata kutiliwa shaka kwamba zinafanya shughuli zisizokuwa na uwazi. “Ni bora shughuli zenu mnazofanya ziweze kuungwa mkono na Watanzania wote.”

chanzo:Habari Leo

KATIBA NI MARIDHIANO: VINGINEVYO NI CHIMBUKO LA MITAFARUKU

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

KWA muda mrefu kabla ya kurejeshwa kwa mfumo wa demokrasia ya vyama vingi vya siasa yalikuwapo madai ya kupata Katiba mpya. Madai haya yaliongezeka na kupata nguvu zaidi baada ya kuingia kwa mfumo wa vyama vingi. Kwa kiasi kikubwa madai haya yalichangiwa na mapendekezo ya Tume ya Jaji Francis Nyalali ambayo, pamoja na mambo mengine, ilitamka kwamba mfumo wa vyama vingi usingeweza kustawi chini ya Katiba iliyotungwa na chama kimoja kwa lengo la kulinda maslahi yake. Pendekezo hilo halikukubaliwa na badala yake mfumo wa vyama vingi ukarejeshwa chini ya katiba ya mwaka 1977 bila maelezo wala mjadala.

Hivyo madai ya Katiba mpya yakaendelea na hatimaye kuwagawa Watanzania katika makundi matatu. Kundi la kwanza lilidai Katiba mpya. La pili lilidai kwamba hakuna haja ya jambo hili na la tatu likipendekeza marekebisho ya mambo fulani fulani katika Katiba ya mwaka 1977. Mwishowe, lakini kwa shingo upande, serikali ilianzisha mchakato wa kutunga Katiba mpya.

Hata hivyo mivutano iliendelea kati ya makundi haya na hasa kati ya wale waliotaka Katiba ya kuleta mabadiliko ya msingi na wale waliopinga mabadiliko hayo. Kwa kiasi kikubwa hali hiyo inaendelea na ndiyo ilivuruga mjadala na kusababisha mgawanyiko ndani ya Bunge Maalumu la Katiba mpaka wabunge wa Ukawa wakatoka na mchakato mzima wa kutunga katiba ukavurugika. Mgawanyiko huo umeendelea kukua mpaka Ukawa wakaamua kususia kura ya maoni na baadhi ya maaskofu kuwashauri waumini wao kupiga kura ya hapana.

Katiba ni nini?

Katiba ya nchi ina maana angalau tatu. Maana ya kwanza ni Katiba kama makubaliano ndani ya jamii husika kuhusu mambo muhimu yanayohusu maisha ya jamii hiyo na jinsi ya kuyasimamia na kuyaendesha. Mambo hayo ni pamoja na tunu (core values), mfumo wa uchumi, maadili na miiko ya jamii na viongozi wake, pamoja na upeo na dira ya jamii hiyo. Maana ya pili ni Katiba kama mkataba kati ya watawala au viongozi na watawaliwa au wananchi kuhusu mfumo wa uongozi au utawala unaowafaa.

Sura hii hujumuisha mambo kama haki za raia, mipaka ya mamlaka ya serikali, mihimili ya dola na madaraka yake ikiwamo bunge, serikali na mahakama. Maana ya ya tatu ni katiba kama sheria mama. Katika mwonekano huu katiba huweka misingi ya sheria zinazoweza kutungwa na bunge au mamlaka nyingine zisiende kinyume na masharti ya katiba; vinginevyo zinavunja katiba na hivyo kuwa batili. Katika hali halisi nyuso hizi zote za katiba huunganika katika katiba moja

Katika uzoefu wa ulimwengu kuna katiba zilizoandikwa na zile ambazo hazijaandikwa zinazotegemea historia, maamuzi ya mahakama, miswada ya Bunge na utamaduni wa ki-siasa wa nchi husika. Uingereza, kwa mfano, haina katiba kama andiko maalum ila hutegemea mkusanyiko wa maamuzi mbali mbali ya bunge, serikali na mahakama. Vile vile kuna katiba zilizotungwa kulinda maslahi ya tabaka la wachache wenye mamlaka ya kutawala na kukandamiza walio wengi. Hata hivyo katiba za kisasa katika zama za demokrasia ni katiba zinazotungwa kuweka mamlaka ya juu mikononi mwa wananchi ambao huwa na uwezo wa kudhibiti wale waliowapa madaraka. Pia katiba ya ki-demokrasia huweka misingi ya haki na usawa katika jamii kwa kuyapa maoni ya kila mwananchi uzito sawa kutegemea nguvu ya hoja na matakwa ya jamii kwa ujumla wake na kujenga uwiano kati ya maslahi ya sehemu mbali mbali ndani ya jamii. Katiba za aina hii hutungwa kwa maridhiano kwa kushirikisha jamii nzima ili kujenga udau na kuweka misingi ya wananchi kuridhia, kuipenda, kuihesimu, kuitii na kuilinda katiba hiyo. Maridhiano huzingatia maslahi ya kila sehemu ya jamii na wakati huo huo kutambua maslahi ya jamii pana. Ili Katiba iwe endelevu ni bora ipate ridhaa ya wananchi sio tu katika kuipigia kura ya maoni bali hasa katika kushirikishwa kikamilifu katika mchakato wa kuitunga. Kwa maana hii mchakato wa kutunga Katiba ni muhimu kuliko zao la mchakato kwa maana ya katiba yenyewe. Kwa maana hiyo vile vile kama tunataka Katiba bora na siyo bora Katiba sharti tuhakikishe kwamba mchakato ni shirikishi, jumuishi na wenye kufikia uamuzi kwa maridhiano. Ni jambo hili pekee ambalo huipa uhalali wa kisiasa na kuondoa uwezekano wa kuirekebisha kila mara. Katiba ya aina hii iliyotungwa kwa kwa maridhiano vile vile hujenga maridhiano na kuweka misingi ya maelewano na amani ndani ya jamii. Katiba ikitungwa kwa misingi ya ‘wengi wape’ hupanda mbegu ya kuibadilisha kila mara. Hii ni kwa kuwa wengi wa leo yawezekana wakawa wachache wa kesho na kwa sababu hiyo uwezekano wa kila kizazi kutaka kutunga Katiba upya utakuwa ni mkubwa! Matokeo yake ni ombwe la ki-katiba. Na hilo ndilo chimbuko la mitafaruku na migogoro isiyoisha katika nchi nyingi za ki- Afrika.

Maridhiano na changamoto zake

Kujenga maridhiano sio kitu chepesi. Inahitaji jitihada kubwa na uwezo wa kuwa na maono na upeo wa mbali, kuzingatia maslahi ya jamii ya muda mrefu, kuepuka ubinafsi na mtizamo finyu na kutetea haki za jamii kwa ujumla wake na hasa za wanyonge. Maridhiano hayajengeki kwa kugangania misimamo bali kwa kujali maslahi ya wote. Daima maslahi binafsi au ya tabaka fulani ni adui wa maridhiano. Je, maridhiano ni nini? Njia ya kutatua migogoro yenye wahusika au wadau wengi wenye maslahi yanayokinzana kwa kumshirikisha kila mdau. Maridhiano hufikiwa kwa nipe nikupe na siyo kutumia nguvu, ujanja au ghilba.

Maridhiano yana lengo la kupatanisha wadau sio kiwatenganisha. Kamwe maridhiano hayafikiwi kwa uwingi wa makundi bali kwa nguvu ya hoja zinazozingatia maslahi ya jamii kwa ujumla wake. Hivyo kwa kawaida maridhiano hayafikii maamuzi kwa kupiga kura ila kwa kufikia mwafaka.

Maridhiano huhitaji usikivu na uvumilivu wa hali ya juu, kila mhusika akitoa dukuduku zake na kila mmoja akiwasikiliza wenzake kwa kujaribu kujiweka kwenye mazingira yao.

Maridhiano hulenga kupata suluhisho linalokubalika na wote sio lile linalopendwa na wote au kundi fulani. Kila mhusika anaweza kuishi kwa matumaini chini ya suluhisho hilo.

Ni muhimu kushawishi kila mhusika ili kuepuka uwezekano wa wasioridhika kukwamisha utekelezaji wa makubaliano au kuyavunja kabisa.

Faida za maridhiano

Maridhiano yana faida kadhaa, ambazo ni pamoja na mosi, maridhiano huweka misingi imara ya kuheshimu na kufuata makubaliano; pili, maridhiano hujenga udau ndani ya nyoyo na fikra za wahusika wote wajione ni wamiliki wa makubaliano hayo; tatu, maridhiano huzaa suluhu bora kwa kuchambua, kushindanisha na kuunganisha hoja tofauti kupata yenye nguvu ya hoja; nne, maridhiano huwahakikishia wahusika wote kwamba wenzao wanajali maslahi yao na kuweka mazingira ya kuaminiana, kuheshimiana na kushirikiana katika migogoro mingine.

Tano, maridhiano hujenga mazingira ya kusikilizana na kuvumiliana katika jamii yenye mitazamo tofauti na saba; maridhiano huondoa majungu, fitina, ubabe na unafiki na badala yake kukuza ukweli, uwazi na ushawishi wa hoja hasa katika mambo ya msingi katika jamii.

Kutoka mchakato wa maridhiano hadi mpasuko

Akitangaza nia ya kuanzisha mchakato wa kutunga katiba mpya katika hotoba yake ya kufunga mwaka wa 2011 na kufungua 2012. Rais, pamoja na mengine, alisema yafuatayo: “Wananchi watapewa fursa ya kutosha ya kutoa maoni yao kwa uhuru na pawepo kuvumiliana kwa hali ya juu pale watu wanapotofautiana kwa mawazo. Pasiwepo kutukanana, kudharauliana, kushutumiana, kubezana, kuzomeana wala kushinikizana. Naomba washiriki waongozwe kwa hoja badala ya jazba. Tukiwa na jazba, hasira na kushinikizana kamwe hatutaweza kutengeneza jambo jema. Na inapohusu Katiba ya nchi itakuwa hasara tupu. Haitakuwa endelevu na kulazimika kufanyiwa marekebisho mengi mwanzoni tu baada ya kutungwa.”

Hatimaye maneno haya yalitafsiriwa kama mdhumuni makuu katika sheria ya mabadiliko ya Katiba baadaye. Sheria ya Mabadiliko ya Katiba Sura ya 83(2012) – Sehemu ya pili (madhumuni) imeainisha, pamoja na mengine, masharti yafuatayo ikiagiza Tume ya Mabadiliko ya Katiba:

4(1) e – Kuweka utaratibu ambao utaruhusu wananchi kushiriki kwa uwazi na kwa mapana katika kutoa na kuwasilisha maoni yao kuhusu katiba. Na 4(1) j – Kuweka utaratibu utakaowezesha kujenga mwafaka wa ki-taifa katika masuala yenye maslahi kwa taifa wakati wa mchakato kuhusu Katiba.

Kwa tafsiri pana mchakato wa kutunga katiba mpya siyo tu ulikuwa na lengo la kuzaa katiba kama andiko ila pia ulinuia kufanikisha yafuatayo: kwanza, kupata katiba iliyotungwa kwa maoni huru ya wananchi yaliyotolewa kwa misingi ya usawa, uwazi na bila hofu au shinikizo lolote; pili, kutumia mchakato wa kutunga katiba kujenga maridhiano ya kisiasa na kijamii kupitia Tume ya Mabadiliko ya Katriba, Mabaraza ya Katiba katika kila wilaya, Bunge Maalum la Katiba na hatimaye wananchi wote kupitia kura ya maoni; tatu, kufikia mwafaka wa kitaifa kuhusu mustakhabali wa muungano.

Lakini nne, ni kuweka misingi ya kujenga utamaduni wa kutii, kutetea na kuilinda katiba kwa hiari na moyo wa uzalendo na tano; kujenga tabia ya kuvumiliana katika majadiliano kwa kutegemea nguvu ya hoja badala ya kulazimisha hoja za nguvu katika kufikia uamuzi hasa wa kisiasa.

Maridhiano katika Tume na mitafaruku Bunge Maalumu

Tume ya Mabadiliko ya Katiba iliundwa na wajumbe ambao mwanzoni mwa kazi yetu walikuwa na mitazamo na hata misimamo tofauti kuhusu mambo mengi yahusuyo katiba. Kuhusu Muungano, kwa mfano, mimi binafsi nilipendelea muundo wa serikali moja na baadhi ya Wazanzibari walipendelea Muungano wa ‘nkataba’ (mkataba) usiokuwa wa kikatiba. Lakini tangu mwanzoni wajumbe tulikubaliana kuongozwa na maoni ya wananchi kama msingi mkuu wa Katiba.

Tulijiwekea taratibu zilizosisitiza kuweka mazingira ya wananchi kutoa maoni yao kwa uhuru na wengine wote (tukiwamo sisi) kuwasikiliza kwa umakini na utulivu. Mjumbe wa tume hakuruhusiwa kumwingilia mwananchi katika kutoa maoni yake ila tu pale alipotaka ufafanuzi wa jambo. Utaratibu mwingine ni kwamba tulikubaliana kufikia uamuzi kwa maridhiano. Kama kulitokea tofauti juu ya jambo lolote tulijadiliana, keelezana na kuelimishana mpaka tukakubaliana.

Mijadala hii mara nyingine ilikuwa mikali na kuzua hofu ya wajumbe kuvaana kwenye vikao. Kamwe hakukuwa na malumbano, mipasho au kejeli kama sote tulivyoshuhudia katika Bunga Maalumu. Kwa maana hiyo rasimu ya pili ilipitishwa kifungu kwa kifungu kwa maridhiano na bila mjumbe hata mmoja kutofautiana na wenzake. Hata mara moja hatukupiga kura na kuamua jambo kwa wingi au uchache wakura. Hata kama ingepigwa kura ingekuwa ya ‘ndio’ kwa asilimia moja.

Sheria ya Mabadiliko ya Katiba ya awali (Sura ya Ibara 20(3) na (4) ilimwagiza Mwenye Kiti wa Tume kuiwasilisha Rasimu kwenye Bunge Maalumu na kwa madhumuni ya kifungu hicho ilitamka kwamba “…Mwenyekiti na wajumbe wa Tume wanaweza kutoa ufafanuzi utakaohitajika wakati wa majadiliano katika Bunge Maalum” Kwa bahati mbaya kifungu hicho kilifutwa baada ya rasimu ya pili. Hii ndiyo ilikuwa dalili ya kwanza kwamba mchakato utavurugika kama mlivyoufuatilia. Tume ilikuwa imejiandaa sio tu kufafanua mambo lakini vilevile kusaidia kujenga maridhiano ndani ya Bunge Maalumu kama ilivyokuwa kwenye Tume. Kuondolewa kwa tume, kwa mfano, kemesababisha tafsiri potofu ya muundo wa shirikisho. Kilichopendekezwa na Tume katika hili ni kuanzisha dola la Muungano lenye mamlaka kamili juu ya serikali mbili zinazounda muungano. Kabla ya hapo Muungano umekuwa kama yatima na hivyo kukosa mamlaka ya kuutetea na kuulinda bila kukwazwa na mgongano wa maslahi. Hilo ndilo chimbuko shina la maradhi ya Muungano na ‘Kero za Muungano’ ni dalili tu za maradhi hayo. Bila kuwa na dola la Muungano hali hii itaendelea na hatimaye inaweza kuwa chanzo cha Muungano kuvunjika.

Jambo jingine lililochangia kuvurugika kwa Bunge kwa kiasi kikubwa ni hotuba ya Rais ya kuzindua Bunge hilo. Kwanza, katika hali isiyokuwa ya kawaida, badala ya Rais kuhutubia Bunge na kulizindua kwanza, zilifanyika hila za kupangua utaratibu huo wa kawaida ili Rais azungumze baada ya Mwenyekiti wa Tume ili akajibu hotuba ya Mwenyekiti na kuweka misimamo ya chama chake. Kuanzia hapo Bunge likagawanyika, wana-Ukawa wakatoka nje na mpasuko ndani ya taifa letu ukastawishwa. Hadi leo mpasuko huo unaendelea kukua. Mchakato ambao ungeziba nyufa alizoziona Mwalimu Julius Nyerere, kabla ya kifo chake sasa umezipanua.

Jambo la tatu lililovuruga mchakato lilihusu mamlaka ya Bunge Maalumu. Katika hotuba yake ya ufunguzi, Rais aliwaambia wajumbe kama ifuatavyo: “Kile ambacho wajumbe mtaona kinastahili kuboreshwa au kurekebishwa au kufutwa msisite kufanya hivyo ili watanzania wapate katiba iliyo bora”. Kwa kutoa kauli hii Rais ki-msingi aliweka maoni ya wajumbe juu ya yale ya wananchi yaliyopokelewa na kuratibiwa na Tume kisheria na kuwasilishwa kwenye Rasimu ya pili. Wajumbe wa BMK hawakukusanya maoni ya wananchi na hawakuwa na mamlaka hiyo. Jambo hili ni kinyume cha lengo kuu la mchakato – kupata katiba iliyotungwa kwa maoni ya wananchi. Itakumbukwa kwamba jambo hili lilipelekwa mahakamani pamoja na ombi la kusimamisha bunge lakini hukumu ya Mahakama ilishindwa kuliamua kwa ubayana.

Jambo la nne lililovuruga mchakato ni kishindwa kwa mwenyekiti wa BMK kufuata dhamira na masharti ya Sheria ya Mabadiliko ya Katiba. Mjadala wene fujo, matusi, kejeli na ubaguzi ulijenga uhasama baina ya wa-Tanzania ndani na nje ya BMK. Uamuzi wote, ukiwamo wa kupitisha Katiba inayopendekezwa, ulifanyika kwa jazba, shinikizo na pengine ulaghai hasa wajumbe walipodaiwa kupiga kura wakiwa Hijja na wengine kukana kupiga kura ya ndiyo. Jambo hili la Katiba ya nchi ni jambo kubwa kiasi kwamba halistahili hata kidogo kufanya kwa mtindo ambao umejenga mgawanyiko katika jamii yetu na kutikisa maridhiano ya serikali ya kitaifa Zanzibar. Nilishangaa na kusikitika pale BMK liliposherehea kumaliza kazi kwa vifijo, gombesuku na mdundiko na miduara. Na niliduwaa zaidi pale akina mama waliposhona sare za makenzi wakisherehekea kushindwa kufikia malengo tuliyojiwekea kama taifa la kupata Katiba yenye ridhaa ya wote. Badala ya kusikitika kwa kushindwa kufikia malengo yetu tukasherehea kupata katiba kwa mgawanyiko wa Taifa letu! “Watu wa ajabu sana…” angestaajabu Mwalimu Nyerere!

Ni nini kifanyike sasa?

Hatua inayofuata ni ya Kura ya Maoni juu ya Katiba inayopendekezwa. Hadi sasa haijulikani kama kura hiyo itapigwa mwishoni mwa Aprili kama alivyotamka Rais. Mpaka sasa daftari la wapiga kura halijaboreshwa na hatua muhimu ya kulihakiki ni kama imeachwa kiasi kwamba kura itapigwa siku moja baada ya uandikishaji. Vile vile sheria imetoa muda wa elimu ya umma wa miezi miwili na kampeni ya mwezi mmoja. Yakitimizwa haya yote na kutekelezwa kwa weledi na ukamilifu kama sheria inavyoagiza, kura haiwezi kufanyika kabla ya mwezi wa Julai. Tusije tukajikuta tunatunga Katiba kwa utaratibu wa kuvunja au kupindisha sheria kwa shinikizo la ‘lazima tupate Katiba ya Kikwete’. Maslahi ya muda mfupi yasiathiri ya muda mrefu na maisha ya taifa. Kwa vyovyote vile katiba iliyotokana na mitafaruku na mchakato ulioharibika haitufai.

Kura ya maoni iahirishwe ili tujitafakari na kujipanga upya. Kama alivyosema Rais Kikwete katika hotuba yake ya kufungua mwaka wa 2012: “Tukiwa na jazba, hasira na kushinikizana kamwe hatutaweza kutengeneza jambo jema. Na inapohusu Katiba ya nchi itakuwa hasara tupu. Haitakuwa endelevu na kulazimika kufanyiwa marekebisho mengi mwanzoni tu baada ya kutungwa.”

Kwa bahati mbaya au kwa maksudi hiyo ndiyo hali halisi inayotukabili kwa sasa. Kama taifa tunahitaji busara, hekima na ujasiri wa kutambua hili na kuchukua hatua zitakazotuwezesha kurejesha utangamano katika jamii na kujipanga upya kwenye jambo la msingi kama Katiba.

Makala haya yameandikwa na Profesa Baregu ambaye alikuwa Kamishna wa Tume ya Mabadiliko ya Katiba, anapatikana kwa simu 0787506381.

Chanzo:Raia Mwema

Rais Kikwete aongoza mazishi ya Kapteni DAMIANO Komba kijijini lituhi

Askofu wa Kanisa Katoliki jimbo la Mbinga Mhashamu John Ndimbo akiongoza ibada ya mazishi ya aliyekuwa mbunge wa Mbinga Magharibi marehemu Kapteni John Damiano Komba wakati wa ibada ya mazishi yake yaliyofanyika kijijini kwake Lituhi wilayani Nyasa Mkoani Ruvuma leo.(picha na Freddy Maro).

Rais Dkt.Jakaya Mrisho Kikwete na mkewe Mama Salma Kikwete wakiweka udongo katika kaburi la aliyekuwa mbunge wa Mbinga Magharibi marehemu Kapteni John Damiano Komba wakati wa ibada ya mazishi yake yaliyofanyika kijijini kwake Lituhi wilayani Nyasa ,Mkoani Ruvuma.

Rais Dkt.Jakaya Mrisho Kikwete na mkewe Mama Salma Kikwete wakiweka shada la maua katika kaburi la aliyekuwa mbunge wa Mbinga Magharibi marehemu Kapteni John Damiano Komba wakati wa ibada ya mazishi yake yaliyofanyika kijijini kwake Lituhi wilayani Nyasa ,Mkoani Ruvuma. Habari na picha na IKULU.

Rais wa Jamhuri ya Muungano wa Tanzania, Mheshimiwa Jakaya Mrisho Kikwete leo, Jumanne, Machi 3, 2015, ameungana na mamia ya waombolezaji kumzika Mbunge wa Jimbo la Nyasa na msanii mahiri wa muziki nchini, Mheshimiwa Kepteni John Damiano Komba, kwenye makaburi ya Kanisa Katoliki katika Kijiji cha Lituhi, Wilaya ya Nyasa, Mkoa wa Ruvuma.

Mara baada ya kuwasili kwenye Uwanja wa Ndege wa Songea, akitokea Dar es Salaam, kiasi cha saa tano na robo asubuhi, Rais Kikwete amekwenda moja kwa moja Lituhi, karibu kiasi cha kilomita 140 kutoka mjini Songea, kwa ajili ya mazishi ya Mheshimiwa Komba ambaye pia alikuwa Mjumbe wa Halmashauri Kuu ya Taifa (NEC) ya Chama cha Mapinduzi (CCM).

Rais Kikwete amejiunga na waombolezaji akiwemo Spika wa Bunge la Jamhuri ya Muungano wa Tanzania, Mheshimiwa Anne Semamba Makinda kiasi cha saa tisa mchana kwa ajili ya mazishi ya mmoja wa wasanii ambao walijijengea heshima kubwa kwa nyimbo zake za uhamasishaji.

Wakati wa shughuli za mazishi ambazo kidini zimeongozwa na Askofu John Ndimbo wa Jimbo Katoliki Mbinga, waombolezaji walisomewa salamu za rambirambi ambazo zimetumwa na Rais wa Pili wa Malawi, Mheshimiwa Bakili Muluzi ambaye sasa amestaafu.

Katika salamu hizo, Mheshimiwa Muluzi amesema: “Nilimjua Komba kama rafiki na taarifa za kifo chake cha ghafla zimenistua sana.”

Mwili wa Marehemu Komba uliteremshwa kaburini saa 9:30 mchana huku ukishuhudiwa na mjane wa marehemu Salome Komba na watoto wake 11.

Rais Kikwete ameondoka Lituhi mara baada ya mazishi kurejea mjini Songea kumalizia ziara yake ya siku mbili ya kikazi mkoani Ruvuma.

Picha na Ikulu

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

Mtoto Sophia anaomba msaada ili aweze kupata matibabu

Sophia Abdul (14)
Na Amon Mtega – Songea
MTOTO Sophia Abdul (14) anayesoma shule ya msingi Lilahi darasa la tano iliyopo kata ya Mhukulu wilaya ya Songea vijijini mkoani Ruvuma amekumbwa na ugonjwa usiofahamika ambao umejitokeza kwenye jicho lake la kulia lililo vimba na kutokezea nje hali inayomletea maumivu makali na kushindwa kwenda shule huku akiomba msaada kwa wasamaria wema.
Akiongea na waandishi wa habari katika ofisi za elimu za wilaya hiyo mama wa mtoto huyo Joyce Nyoni alisema kuwa mwanae alianza kupatwa na ugonjwa huo toka Aprili mwaka jana lilianza kuwasha kisha kujitokeza uvumbe ambao umepelekea jicho hilo kushindwa kuona huku likiwa limetoka kwa nje.
Alisema baada ya kuona hali ya mwanae inazidi kuwa mbaya alimpeleka katika hospitali ya rufaa ya mkoa wa Ruvuma na kukutana na madaktari ambao walimwambia kuwa ugonjwa huo hawatauweza badala yake walimtaka atafute fedha ampeleke katika hospitali ya rufaa ya Muhimbili.
Joyce aliongeza kuwa baada ya kupata maelekezo ya madaktari aliamua kupita kuomba msaada kwa wasamaria wema ili kunusuru maisha ya mwanane kwa kuwa yeye mwenyewe hana uwezo wa kifedha na kwamba baba wa mtoto huyo Abdul Rashid alimtelekeza toka akiwa na umri wa mwaka mmoja.

Alisema kufuatia hali hiyo mwanae hajahudhuria masomo toka walipofungua shule jambo ambalo linaweza kumrudisha nyuma katika maendeleo yake na haki ya kupata elimu,hata hivyo aliambiwa na madaktari hao kuwa pindi atakapopata fedha za matibabu watamwandikia kibari cha kumruhusu kwenda kupata matibabu Muhimbili.
Aidha mama wa mtoto huyo anawaomba wasamaria wema kutoa mchango wao wa hali na mali ili afanikiwe kumpeleka mwanae kwenye matibabu kiwango cha fedha kinachohitajika hadi sasa hajafahamu baada ya kupewa kibali atafahamishwa kwa watakao guswa na tatizo la mtoto Sophia watoe michango yao kwa simu namba 0683115075 ya mama yake.

MIAKA 38 YA CCM MJINI SONGEA‏ ILIVYOFANA

Katibu Mkuu wa CCM Ndugu Abdulrahman Kinana akisalimia wananchi wakati akiingia kwenye uwanja wa Maji Maji mjini Songea kwenye sherehe za kuadhimisha miaka 38 ya kuzaliwa kwa CCM ambapo kitaifa zimefanyika mkoa wa Ruvuma.

Mwenyekiti wa CCM Taifa Rais Jakaya Mrisho Kikwete akivishwa skafu na kijana wa chipukizi mara baada ya kuwasili kwenye uwanja wa Maji Maji mjini Songea kwenye sherehe za maadhimisho ya miaka 38 ya kuzaliwa kwa CCM.

Baadhi ya viongozi wakiwasili kwenye uwanja wa Maji Maji kwenye maadhimisho ya sherehe za miaka 38 ya kuzaliwa kwa CCM

Mwenyekiti wa CCM Taifa,Rais Dkt.Jakaya Mrisho Kikwete akikwagua gwaride la chipukizi.

Vijana wa Chipukizi wakionyesha ukakamavu kwenye onyesho la Halaiki wakati wa maadhimisho ya sherehe za miaka 38 ya kuzaliwa kwa CCM.

Hivi ndivyo uwanja wa maji maji ulivyofurika kwenye sherehe za maadhimisho ya kutimiza miaka 38 tangu kuzaliwa kwa CCM.

Vijana wa Chipukizi wakitoa heshima kwa mgeni rasmi.

Vijana wa chipukizi wakionyesha ukomavu wao wa mafunzo wanayopata.

Umati

Kepteni John Komba akiimba pamoja na Abdul Msimbano wakati TOT ilipokuwa ikitumbuiza wananchi waliofurika kwenye uwanja wa Maji Maji na Kutambulisha nyimbo yao mpya.

Bendi ya TOT ikishambuliwa Jukwaa wakiwa chini ya Uongozi wa Kepteni John Pemba.

Katibu Mkuu wa CCM Ndugu Abdulrahman Kinana akisalimia wananchi na kumkaribisha Mwenyekiti wa CCM Taifa Rais Dkt Jakaya Mrisho Kikwete kuhutubia hadhira iliyojaza watu kutoka kila kona ya mji wa Songea na majirani zake.

Vijana wakiangalia picha ya Hayati Abeid Aman Karume ,Rais wa Kwanza wa Serikali ya Mapinduzi Zanzibar wakati wa maadhimisho ya miaka 28 ya kuzaliwa CCM ambapo kitaifa zimefanyika kwenye uwanja wa Maji Maji mjini Songea mkoa wa Ruvuma.

Msanii Diamond akiwaburudisha maelfu ya watu waliofurika kwenye uwanja wa Maji Maji mjini Songea kwenye sherehe za kutimiza miaka 38 ya kuzaliwa kwa CCM ambazo kitaifa zimeadhimishwa mkoani Ruvuma.