Ruvuma yazalisha chakula kingi

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Imeandikwa na Mwandishi Wetu, Songea

Aidha, imeelezwa kuwa mkoa huo umezalisha tani 689,123 za mahindi ambalo ni zao la chakula, katika msimu wa mwaka 2014/2015. Uzalishaji huo ni sawa na ongezeko la asilimia 17.3 ikiwa ni ongezeko la asilimia 6.7 ya mavuno yaliyopatikana katika msimu wa kilimo wa mwaka 2013/2014.

Mkuu wa mkoa huo Said Mwambungu alisema hayo wakati akizungumza mjini hapa na wajumbe wa kikao cha Kamati ya Ushauri ya mkoa wa Ruvuma. Alihimiza wananchi kutobweteka kutokana na mafanikio hayo badala yake waongeze juhudi katika uzalishaji hasa katika kilimo.

Aidha alisema kwamba wastani wa pato kwa mtu mmoja limezidi kukua kutoka Sh 1,913,526 mwaka 2013/2014 hadi kufikia Sh 2,082,167 ambalo ni ongezeko la asilimia nane kwa mwaka 2014/2015. Mwambungu alisema, kwa takwimu hizo inaonesha mkoa wa Ruvuma ni mkoa wa tano ukitanguliwa na mikoa ya Dar es Salaam, Iringa, Kilimanjaro na Arusha.

Hata hivyo Mkuu huyo wa Mkoa alisema lengo ni kushika nafasi ya kwanza ifikapo mwaka 2018.

Alisema, mkoa unaendelea kupiga hatua nzuri katika ukuaji wa uchumi unaoendana na kuboresha maisha ya wananchi wake.

Mwambungu ametoa mwito kwa wakuu wa wilaya na wakurugenzi wa halmashauri kusimamia na kuchukua hatua dhidi ya watu wanaohujumu kazi za kilimo ili usimamizi wake uende hadi katika ngazi ya kijiji. Alisema serikali itaendelea kuhakikisha wananchi hususani wakulima wanapata soko na bei nzuri ya mazao yao.

Chanzo: Gazeti la Habari leo

HIZI NDIZO SABABU ZILIZOPELEKEA WANAFUNZI WA SHULE YA SEKONDARI NAMABENGO ILIYOPO MKOANI RUVUMA KUANDAMANA.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

Wanafuzi 106 wa kidato cha sita katika shule ya sekondari ya Namabengo wilaya ya Namtumbo mkoani Ruvuma wameandamana kwenda kumwona mkuu wa mkoa Said Mwambungu kumpelekea malalamiko dhidi ya vitendo vya udharirishaji wanavyofanyiwa na makamu mkuu wa shule hiyo Shaibu Champunga. Ebu wasikilize kupitia RUVUMA TV on Line.

THOMAS MASHALI KUTAFUTIWA MBABE PASAKA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 Bondia Salum Nassoro akipasha na kocha wake, Maneno Abdallah katika gym yao iliyopo Mazense Midizini.

 Promota wa mchezo huo, Haruna Musa katika picha ya pamoja na bondia, Salum Nassoro.

Kampuni ya Dippo Boxing Promotion ya jijini Dar inayoongozwa na promota, Haruna Musa imeandaa pambano la Uzito wa Kati ‘Middle Weight’ kati ya bondia Salum Nassoro wa Dar na Benson Mwakyembe wa Ruvuma mchezo utakaopigwa Siku Kuu ya Pasaka, Machi 28 mwaka huu.

Pambano hilo la kukata na shoka litapigwa kwenye uwanja wa Majimaji mkoani Ruvuma ambapo kwa mujibu wa promota huyo alisema kuwa mshindi wa siku hiyo atazichapa na bingwa wa Afrika  ‘WBF, Thomas Mashali.

Mabondia hao ambao kila mmoja alitamba kumchapa mwenzake, waliwataka mashabiki wa ndondi kujitokeza kwa wingi kushuhudia mchezo huo ili waone ladha ya ndondi ya asili.

      

BENKI YA POSTA TANZANIA YAJENGA VYOO VYENYE THAMANI YA SH. MILIONI 4.7 KATIKA SHULE YA MSINGI MAKAMBI ILIYOPO MANISPAA YA SONGEA MKOANI RUVUMA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

 Wanafunzi wa shule ya msingi ya Makambi iliyopo Kata ya Ndilima Litembo Manispaa ya Songea mkoani Ruvuma wakifurahia vyoo vya kisasa vilivyojengwa na Benki ya Posta Tanzania.

 Meneja Mwandamizi wa Mahusiano na Mawasiliano wa Benki ya Posta, Noves Moses akiongea kwenye mkutano katika shule hiyo muda mfupi kabla ya kuzindua vyoo hivyo. 

 Meneja Mwandamizi wa Mahusiano na Mawasiliano wa Benki ya Posta, Noves Moses akikata utepe ikiwa ni ishara ya kuzindua vyoo vyenye matundu 14, vitakavyohudumia wanafunzi 850 katika shule ya Msingi ya Makambi, Songea Mkoa wa Ruvuma, ujenzi huo umegharimu shilingi milioni 4.7 kulia ni Meneja wa Oparesheni wa tawi la Songea, Simon Mlelwa.

Meneja Mwandamizi wa Mahusiano na Mawasiliano wa Benki ya Posta, Noves Moses akiwa kwenye picha ya pamoja na walimu wa shule hiyo pamoja na baadhi ya viongozi wa serikali ya mtaa.

Na Mwandishi Wetu

MENEJA mahusiano na mawasiliano wa Benki Posta Tanzania, Noves Moses amelitaka suala la elimu bure liendane na mazingira mazuri ya kimiundo mbinu kwa wanafunzi pamoja na walimu wao ili kuifanya elimu hiyo kuwa bora zaidi.

Rai hiyo aliitoa jana wakati akizindua vyoo vya kisasa vya Shule ya Msingi ya Makambi iliyopo Kata ya Ndilima Litembo Manispaa ya Songea mkoani Ruvuma, ambavyo vimejengwa na Benki hiyo kwa thamani ya shilingi Milioni 4.7 ikiwa ni sehemu ya mchango kwa jamii katika kuboresha mazingira ya elimu.

Akizindua matumizi ya vyoo hivyo vyenye matundu 14, Noves alisema kuwa jamii na taasisi mbalimbali zinatakiwa zitambue kuwa suala la elimu bure linatakiwa liendane na uboreshwaji wa mazingira ya wanafunzi na walimu wawapo shuleni hapo.

Alisema kuwa kumekuwepo na baadhi ya wadau wa elimu kulichukulia suala la elimu bure kama kigezo cha kutokuchangia sekta hiyo na baadala yake wanadai ni kazi ya serikali pekee jambo ambalo siyo sahihi katika uboreshaji elimu.

“Suala la elimu bure lisiwe kigezo cha wadau kushindwa kuichangia sekta hiyo kwani kufanya hivyo kunapelekea baadhi ya shule kushindwa kuwa na mazingira mazuri ya watoto kujisomea pamoja na walimu wao kutokuwa na morali ya kufundisha” alisema Meneja mahusiano .

Noves alisema kuwa Benki ya Posta Tanzania inafanya kazi kwa kiwango kikubwa na serikali hivyo imetoa misaada mbalimbali ya kijamii hasa kwa upande wa afya na elimu huku katika upande wa elimu wamechangia madawati na ujenzi wa vyoo bora vya kisasa kwenye shule mbalimbali hapa nchini .

Kwa upande wake Mwalimu Mkuu msaidizi wa shule hiyo, Kanisius Ngongi awali akitoa taarifa ya shule hiyo kabla ya kukabidhiwa vyoo hivyo alisema kuwa shule hiyo ina wanafunzi 850 na matundu ya vyoo yapo 14 na kuwa vyoo vyote vina maji ya kutosha.

Ngongi aliipongeza benki hiyo alisema kuwa shule hiyo kwa sasa imeshabadilika, mazingira yamekuwa bora kwa upande wa vyoo vya wanafunzi ambavyo kwa sasa hakuna shule ndani ya Manispaa hiyo yenye vyoo kama hivyo.

Mwalimu Ngongi alisema kuwa licha ya vyoo vya wanafunzi kuwa bora lakini bado kuna changamoto ya vyoo vya walimu maana vyoo walivyokuwa wakivitumia vimeshapoteza ubora wake na kuwafanya walimu hao kupata shida mahala pa kujisitili hivyo amewaomba wadau mbalimbali waweze kuchangia kama Benki ya Posta inavyojitolea.

(Imeandaliwa na mtandao wa www. habari za jamii.com-simu namba 0712-727062)

SERIKALI KUSAMBAZA MADAKTARI BINGWA MAENEO YA PEMBEZONI IKIWEMO MKOA WA RUVUMA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Naibu Waziri wa Afya, Dk. Kigwangalla akitoa ufafanuzi juu ya Wizara yake kuhakikisha itapeleka Madaktari bingwa katika mikoa mbalimbali nchini ikiwemo hospitali hiyo ya Mkoa wa Ruvuma wakati wa ziara yake aliyoifanya mapema Februari 13.2016.

Kauli hiyo ya serikali imetolewa na Naibu Waziri wa Afya, Maendeleo ya Jamii Jinsia na Watoto mjini Songea, Dkt. Hamisi Kigwangalla baada ya kufanya ziara ya kushtukiza katika hospitali ya rufaa ya mkoa wa Ruvuma na kituo cha afya cha Mjimwema kilichopo mjini Songea huku akiitaka mikoa ya pembezoni ukiwemo mkoa huo wa Ruvuma kuweka mazingira ya kuwavutia madaktari bingwa kufanya kazi katika mikoa yao.

Kwa upande wake Mkuu wa mkoa wa Ruvuma Bw. Said Mwambungu amesema kuwa mkoa huo umeridhishwa na staili ya ziara ya kushtukiza na kwamba wanajitahidi kuboresha vituo vya afya vya Mjimwema Songea, Madaba na cha wilaya ya Namtumbo ili vipandishwe hadhi kuwa hospitali za wilaya.

Pia Dk. Kigwangalla alipata wasaha wa kutembelea maeneo mbalimbali ya Hospitali hiyo na kujionea utendaji wa kazi huku akitoa wito katika suala la maboresho zaidi.

Imeandaliwa na Andrew Chale wa Modewjiblog, Ruvuma.

Naibu Waziri wa Afya, Dk. Kigwangalla (katikati) akijiandaa kuingia kukagua utendaji wa kazi na vifaa ndani ya chumba cha upasuaji cha Hospitali ya Mkoa wa Ruvuma wakati wa ziara yake hiyo Februari 13.2016.

Naibu Waziri wa Afya, Dk. Kigwangalla akijiandaa kuingia kwenye chumba cha upasuaji wakati wa ziara yake hiyo, aliyoifanya mapema Februari 13.2016.

Naibu Waziri wa Afya, Dk. Kigwangalla akiangalia moja ya vitanda vinavyotumika katika upasuaji hospitalini hapo ambapo hata hivyo aliambiwa changamoto kuwa baadhi ya taa za vitanda hivyo kuwa na hitilafu wakati ziara hiyo mapema Februari 13.2016. (Picha zote na Andrew Chale,modewjiblog-Songea, Ruvuma)

KILWA YAAGIZA TANI 60 ZA CHAKULA CHA NJAA.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

HALMASHAURI ya Wilaya Kilwa imeagiza tani 90 za mahindi mkoani Ruvuma kwa ajili ya kaya zilizoathiriwa na mafuriko.

Mkurugenzi wa Halmashauri ya wilaya ya Kilwa, Twaib Mbasha aliyasema hayo alipozungumza na wajumbe wa Baraza la Madiwani lililofanyika jana.

Alisema halmashauri imechukua hatua mbalimbali kukabiliana na tatizo hilo.

“Gari liko njiani likitokea mkoani Ruvuma linalosafirisha mahindi kuletwa wilayani hapa,” alisema.

Mbasha alisema ni vigumu kuwaacha wananchi hivi hivi bila ya kutoa msaada kwao, kwani hawakutegemea kama wangepatwa na mafuriko.

Alisema juhudi nyingine zilizochukuliwa ni kuwasiliana na ofisi ya Mkuu wa Mkoa na Kitengo cha Maafa cha Ofisi ya Waziri Mkuu ili kupata vyakula, dawa na huduma nyinginezo wanazohitaji wananchi hao.

Madiwani walisema hali si nzuri kwa kata zote, zilizopata mafuriko mwezi uliopita, kwani zinahitaji chakula na kuna hatari ya kutokea magonjwa ya milupuko.

Diwani wa Nanjilinji, Ally Yusufu alisema ekari 3,875 za mashamba ziliathiriwa na mafuriko ya Januari 22 hadi 26 mwaka huu.

Mazao ya chakula yaliyoathiriwa kwenye ekari hizo ni ekari 1,675 za mahindi, 207 mpunga, ekari 88 mtama, 144.5 muhogo, 1755 ufuta na ekari tatu za migomba.

Alisema kaya zilizoathirika ni 771 zenye watu 3,084. Watu hao hawana mahala pa kuishi na sasa wanaishi kwa majirani, marafiki, ndugu na jamaa.

CHANZO: HABARI LEO.

CCM YATAKA MAGUFULI AUNGWE MKONO.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Rais Dk. John Magufuli.

Chama cha Mapinduzi (CCM) mkoani Ruvuma kimewataka wanachama wake kuunga mkono jitihada zinazofanywa na Rais Dk. John Magufuli, katika kupambana na ufisadi na kuwabana wakwepa kodi.

 

Rai hiyo ilitolewa juzi na Mwenyekiti wa CCM mkoa wa Ruvuma Oddo Mwisho, wakati alipokuwa akiwahutubia wananchi, wakiwamo wanachama wa chama hicho kwenye maadhimisho ya miaka 39 ya kuzaliwa kwa CCM, yaliyofanyika katika kata ya Subira, mjini hapa. 

 

Mwisho alisema kutokana na kazi nzuri inayofanywa na Rais Dk. Magufuli, amesaidia kwa kiasi kikubwa kurudisha imani kwa Watanzania na kuifanya CCM kupendwa na kuwa na nguvu zaidi.

 

“Inashangaza kuona baadhi ya wanachama ambao waligombea nafasi mbalimbali za uongozi kipindi cha uchaguzi mkuu mwaka jana kwa bahati mbaya majina yao hayakupitishwa kwenye kura za maoni, wamekuwa mstari wa mbele katika kuikosoa serikali. Hiyo inaonyesha walivyo dhaifu na wachanga kisiasa,” alisema.

 

Kutokana na hali hiyo, alitoa onyo kali kwa wagombea hao walioshindwa na kuendeleza makundi, migogoro na kuwa mstari wa mbele katika kupinga na kukwamisha shughuli za maendeleo.

 

Kwa upande wao, Mwenyekiti wa Umoja wa Wanawake Taqnzania (UWT), Kuruthum Mhagama na katibu wake, Chiku Masanja, waliwashukuru wanawake kwa kuichagua na kuipa ushindi CCM.

 

Naye Katibu wa CCM Wilaya ya Songea Mjini, Juma Mpeli, alisema ajenda ya uchaguzi imekwisha kilichobaki ni chama kuisimamia serikali katika kutekeleza Ilani ya Uchaguzi ikiwamo kuhakikisha mikopo inatolewa kwa makundi ya vijana na wanawake, kufutwa kwa ushuru mdogo mdogo, kushughulikia madai ya watumishi na kuimarisha chama katika ngazi zote.

CHANZO: NIPASHE

WALIMU WATAKIWA KUCHAPA KAZI.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

Waziri wa Elimu, Sayansi, Teknolojia na Ufundi, Profesa Joyce Ndalichako

BAADA ya Halmashauri ya Wilaya ya Songea Vijijini kufanya vibaya katika matokeo ya kumaliza elimu ya msingi mwaka 2015 kwa kushika mkia mkoani Ruvuma, Mkurugenzi Mtendaji wa halmashauri hiyo, Sigsbert Kaijage amewataka walimu kuongeza bidii katika ufundishaji ili kuondoa aibu hiyo kubwa.

Mbali na hilo, Kaijage aliwataka wanafunzi, walimu, wazazi na walezi wilayani humo kushirikiana ili kuinua kiwango cha taaluma kwa lengo la kufikia malengo ya Mpango maalum wa Matokeo Makubwa Sasa (BRN).

Kaijage alitoa mwito huo hivi karibuni wakati akizungumzia kufanya vibaya kwa shule za halmashauri hiyo jambo lililoitia aibu kubwa kwa kuwa ni mara ya kwanza Halmashauri ya Wilaya ya Songea kushika mkia.

Alisema iwapo kila mmoja kuanzia mtoto, mwalimu na mzazi watachukua hatua stahiki na kila mmoja kutimiza wajibu wake itasaidia kufikia kwa malengo yaliyoelekezwa na serikali badala ya jukumu hilo kuliachia serikali.

Kaijage aliwataka wanafunzi wa shule za msingi na sekondari kutumia muda mwingi kwa ajili ya kujisomea na kuepuka kushiriki katika vitendo vibaya vinayoweza kuchangia kukatisha ndoto za maisha yao.

 CHANZO : HABARI LEO.

WAKULIMA WA MAHINDI 'WAILILIA' SERIKALI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

WAKULIMA wa mahindi wilayani Songea mkoa wa Ruvuma, wameiomba serikali kuongeza fedha kwa Wakala wa Taifa wa Hifadhi ya Chakula (NFRA) Kanda ya Songea ili wanunue mahindi mengi kwa msimu wa kilimo wa mwaka 2016/2017.

Wakulima hao walisema kutokana na hali ya hewa ya mwaka huu, hasa kutokana na mvua zinazoendelea kunyesha kwa wingi katika maeneo mkoani Ruvuma, wana imani uzalishaji utakuwa mkubwa, ikilinganisha na msimu uliopita.

Walisema ni vyema sasa serikali ikaanza kutafuta fedha za kutosha kwa ajili ya maandalizi ya ununuzi wa mazao yao, kwa kuwa viongozi wa serikali wanapita kwa wakulima na kuwahamasisha waongeze juhudi, jambo lililoungwa mkono na wakulima wengi wa mkoa huo.

Mkazi wa kijiji cha Mlilayoyo, Joseph Ngonyani alisema wakulima wengi wameitikia mwito wa viongozi unaotaka kuongeza uzalishaji wa mazao ya chakula na biashara mashambani.

Hata hivyo, wasiwasi wao mkubwa ni kama serikali itanunua mazao yao hasa mahindi, zao ambalo ni tegemeo kubwa la kiuchumi.

Robet Mapunda wa kijiji cha Hanga alisema katika msimu wa 2013/2014 na 2015, wakulima wengi walilazimika kuuza mahindi yao kwa hasara kutokana na utaratibu uliotumika wa NFRA kuwatumia mawakala kwenda vijijini kununua mahindi kwa bei ndogo ya Sh 200 na wao kuizuia serikali kwa Sh 500 hadi 550 kwa kilo.

Aliongeza kuwa kutokana na utaratibu huo, hakuna mkulima aliyenufaika na kilimo, badala yake mawakala ndiyo walifaidika na kuwaacha wakulima wengi wakiwa masikini.

Mapunda alisema wakulima walilazimika kuuza kwa bei ya ‘kutupa’ kwa vile walishindwa kupata nafasi ya kupeleka moja kwa moja katika vituo vilivyowekwa na NFRA, kwani wachache ndiyo waliopata nafasi hiyo jambo lililowaumiza wakulima wa mahindi katika maeneo mbalimbali mkoani Ruvuma.

 CHANZO ; HABARI LEO.

ASIYEKWENDA NA KASI YA SERIKALI KUTOVUMILIWA.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

NAIBU Waziri wa Ujenzi, Uchukuzi na Mawasiliano, Edwin Ngonyani amesema, serikali haitamvumilia na kumuonea huruma mkurugenzi wa halmashauri, mji, manispaa na jiji ambaye atashindwa kasi ya utendaji wa Serikali ya Awamu ya Tano.

Mbali na hilo, Naibu Waziri amewaagiza wakurugenzi wote hapa nchini kutumia rasilimali za msitu zilizoko katika wilaya zao kumaliza tatizo la madawati na kusema kwamba hakuna mwanafunzi yeyote atakayekaa chini kwa kukosa dawati.

“Agizo hili ni la serikali ya awamu ya tano, sisi hatuangalii wapi ni lazima uwajibike pale unapoona mambo hayaendi vizuri, hata mkurugenzi wangu na wewe agizo hili linakuhusu, mkurugenzi tumia rasilimali za miti zilizoko katika halmshauri yako kupunguza tatizo la madawati kama lipo,” alisema Ngonyani.

Naibu Waziri ambaye pia ni Mbunge wa Jimbo la Namtumbo, ametoa kauli hiyo mwishoni mwa wiki wakati akizungumza na madiwani na baadhi ya watumishi wa halmashauri ya Namtumbo katika kikao cha Baraza la Madiwani.

Alisema amepiga marufuku tabia ya madiwani kufanya biashara na halmashauri kwa kuwa jambo hilo linaweza kuleta mtafaruku kwa halmashauri na hivyo kushindwa kukamilika kwa miradi ya maendeleo.

Alisema hata yeye japokuwa ni mbunge wa jimbo hilo, hatoweza kufanya biashara Na halmashauri kwani ni kinyume na maadili ya utumishi wa umma hivyo kila kiongozi kuanza kujitafakari nafasi aliyonayo kwa wananchi.

Aidha amewataka madiwani hao kuhakikisha kwamba wanashirikiana na watumishi wa halmashauri kupunguza tatizo la uhaba wa matundu ya choo, madawati na upungufu wa zahanati katika maeneo yao.

CHANZO ; HABARI LEO.

WANAWAKE WAHAMASISHWA KULETA MAENDELEO.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

WANAWAKE wilayani Songea, Ruvuma wametakiwa kuwa chachu ya mabadiliko ya kiuchumi hapa nchini kwa kuwa mfano bora katika kufanya kazi za kujiletea maendeleo.

Wameelezwa wakifanya hivyo, itawawezesha kubadili mawazo na mtazamo kwamba mwanamke ni kiumbe dhaifu anayehitaji kusaidiwa kwa kila kitu katika maisha yake.

Mbali na hayo, wameaswa kutumia uwezo wao kuibadili jamii ya kitanzania kitabia na kifikra dhidi ya mtazamo kwamba mtoto wa kike ndiye anayeongoza katika suala zima la mmomonyoko wa maadili, unaosababishwa na kuingia kwa utandawazi.

Hayo yalisemwa mwishoni mwa wiki na diwani wa Ndilimalitembo katika Manispaa ya Songea, Cresensia Kapinga, wakati akizungumza na wanawake wajasiriamali wa kata hiyo wanaojishughulisha na biashara ndogo ikiwemo matunda na mboga.

Alisema hivi sasa kuna vitendo vya mmomonyoko mkubwa wa maadili hapa nchini ambapo vijana wanaiga mienendo ya kigeni na wakati na kuacha mila na desturi ya Mtanzania, jambo ambalo ni hatari.

Kwa mujibu wa Kapinga ni kwamba vitendo hivyo vinahitaji nguvu ya pamoja kwa wazazi na walezi na hata kwa jamii husika kwa sababu tayari imeonekana katika baadhi ya familia mzazi anashindwa kukemea tabia hizo na kusababisha vijana wengi kuangamia.

Alisema asilimia kubwa ya watoto wa kike wanaambukizwa virusi vya Ukimwi na vijana wa kiume wanaingia katika matumizi zaidi ya dawa za kulevya.

CHANZO ; HABARI LEO.

Mbunge Kessy ataka serikali ibane matumizi zaidi

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Mbunge wa Nkasi kaskazini Ally Keissy amewataka wabunge waungane kukataa matumizi ya serikali kuwaleta wakurugenzi,wakuu wa mikoa pamoja madereva kwenda Dodoma kushiriki vikao vya Bunge kwani fedha nyingi hupotea bila mafanikio kuonekana.

Kessy ameyasema hayo wakati akichangia mjadala wa kuijadili hotuba ya Rais aliyoitoa wakati wa ufunguzi wa Bunge la 11.

''Huu utaratibu wa kuwaleta madereva, na wakurugenzi pamoja na wakuu wa mikoa ni lazima wabunge tuungane kupinga matumizi yasiyo ya lazima,hapa na tuanze na hawa maana kuwasafirisha wakuu wote hawa nchi nzima kuja Dodoma hizo fedha zingeelekezwa katika sehemu nyingine kusaidia miradi ya wananchi''Amesisitiza Kessy.

Aidha Kessy ameiomba serikali kumuunga mkono jimboni kwake katika kwenda kuhakiki fedha zilizotumwa kwa ajili ya miradi ya maji na mbolea kwa wakulima kwani fedha nyingi zimeliwa.

MWALIMU AKUTWA AMEJINYONGA CHUMBANI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Kaimu Kamanda wa Polisi Mkoa wa Ruvuma, Revocatus Malimi.

Mwalimu wa Shule ya Msingi Peramiho, Songea mkoani Ruvuma, Baraka Mwakajila (29), amekutwa amefariki dunia baada ya kujinyonga kwa kutumia shati ndani ya nyumba alimokuwa akiishi.

 

Kaimu Kamanda wa Polisi Mkoa wa Ruvuma, Revocatus Malimi, alisema jana kuwa tukio hilo limetokea juzi saa sita mchana katika mji mdogo wa Peramiho, nje kidogo ya Manispaa ya Songea.

 

Malimi alisema inadaiwa kuwa siku hiyo ya tukio, Mwalimu Mkuu Msaidizi, Rashid Pilly, aligundua kujinyonga kwa mwalimu huyo, baada ya kupita eneo la nyumba aliyokuwa anaishi na kuona nzi wengi wametapakaa kwenye eneo la dirisha la chumba alichokuwa analala.

 

Alifafanua zaidi kuwa Mwalimu Pilly baada ya kuona hali hiyo, alisogea hadi mlangoni na kukutwa mlango ukiwa umefungwa huku eneo hilo likiwa na harufu kali iliyoashiria kuna kitu ambacho kimeoza.

 

Alisema baadaye Mwalimu Pilly alilazimika kwenda kutoa taarifa kwenye kituo kidogo cha Polisi cha Peramiho na baadaye askari polisi wakiwa wameongozana na mganga, walifika eneo la tukio.

 

Baada ya kufika, alisema walivunja mlango na kuingia ndani ya nyumba hiyo ambako walimkuta Mwalimu Mwakajila akiwa tayari ameshakufa muda mrefu baada ya kujinyonga.

 

Alisema Mwakajila alijinyonga ndani ya nyumba ambayo ni mali ya shule na askari walikuta barua chini ya sehemu aliyojinyongea iliyokuwa imeandikwa Januari 4 mwaka huu na mwanamke (jina linahifadhiwa), anayedaiwa kuwa ni mpenzi wake, ambaye alimtaka aachane naye na aendelee na maisha yake.

 

Malimi alisema polisi baada ya kuiona na kuisoma, waliendelea kuufanyia upekuzi mwili wa marehemu na kukuta pia karatasi kwenye mfuko wa suruali yake, ambayo Mwakajila aliandika Januari 2, mwaka huu, akimtuhumu mpenzi wake huyo kuwa amekuwa malaya na mlevi

 

Kamanda Malimi alisema polisi wanaendelea na uchunguzi zaidi kuhusiana na tukio hilo na mwili wa marehemu umekabidhiwa kwa ndugu kwa ajiki ya taratibu za mazishi.

CHANZO: NIPASHE

ELIMU BURE BADO KIZUNGUMKUTI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Rais Dk. John Magufuli.

Wakati utekelezaji wa mpango wa elimu bure ya Rais Dk. John Magufuli, ukianza jana, baadhi ya wazazi wamekumbwa na sintofahamu baada ya wanafunzi kurudishwa nyumbani wakidaiwa michango na maeneo mengine utitiri wa wanafunzi ukiwa kikwazo, huku kwingine mwamko wa uandikishaji ukiwa chini.

Mwishoni mwa mwaka jana, serikali ilitoa mwongozi wa elimu ya msingi (shule ya msingi mpaka kidato cha nne) kuwa wazazi watatakiwa kununua sare za shule na michezo, madaftari, kalamu, chakula kwa wanafunzi wa kutwa na kugharamia matibabu ya watoto wao.

Ilisema, watatakiwa pia kulipia nauli ya kwenda shule na kurudi kwa wanafunzi wa kutwa na wa bweni wakati wa likizo, kununua magodoro, shuka, vifaa vya usafi binafsi kwa wanafunzi wanaosoma shule za bweni na wanaoishi katika hosteli zinazotumiwa na serikali.

Hali shuleni, ruvuma

Mkoani Ruvuma, baadhi ya wanafunzi wanaosoma katika shule ya Sekondari ya Kutwa ya Nandembo iliyopo wilayani Tunduru Mkoani Ruvuma, walifukuzwa kwa madai ya kushindwa kuwasilisha michango.

Wakizungumza kwa nyakati tofauti baadhi ya wanafunzi hao wanaoishi hosteli iliyojengwa eneo la shuleni hapo kutokana na kuishi mbali na shule, walisema walifukuzwa kutokana na wazazi wao kushindwa kuchangia michango ya chakula, kusagia nafaka na michango ya kulipa mpishi.

Kwa mujibu wa wanafunzi hao, kila mtoto ambaye amechaguliwa kusoma katika shule hiyo akiwa anatokea vijiji jirani, anatakiwa kuchangia debe nne za mahindi, moja la mpunga, kilo 30 za maharage, kilo mbili za chumvi, lita mbili za mafuta, Sh.10,000 kwa ajili ya kusagia mahindi na Sh. 5,000 za kumlipa mpishi wa shule hiyo.

Wanafunzi Waziri Seifu, Kadiri Ally na Fadhili Rajabu kutoka katika Kijiji cha Muhuwesi wanaosoma kidato cha pili katika shule hiyo walisema kuwa wanarudi nyumbani wakiwa hawana matumaini ya kurejea tena shuleni kuendelea na masomo yao kwa kuwa wazazi wao hawatawapatia michango hiyo hasa kwa kipindi hiki ambacho makwao wanakabiliwa na upungufu wa chakula.

Akizungumzia tukio hilo Mkuu wa shule hiyo, Mary Ndunguru, alikiri kuwarudisha baadhi ya wanafunzi hao ili wakachukue chakula majumbani kwao kwa madai kuwa hali hiyo imetokana na shule yake kutokuwa na uwezo wa kuwahudumia watoto hao kwa kuwapatia chakula siku za masomo yao.

Afisa Elimu wa Shule za Sekondari Wilayani Tunduru, Ally Mtamila, alisema ofisi yake kwa kushirikiana na ya mkurugenzi mtendaji wa halamshauri ya wilaya hiyo, walikwishapeleka taarifa za maelekezo kwa madiwani, waratibu elimu kata, yaliyowataka kufanya mikutano ya kufafanua maelekezo ya serikali juu ya utoaji wa elimu bure.

Mtamila aliendelea kufafanua kuwa kwa mujibu wa maelekezo hayo kutoka Tamisemi, fedha walizopokea kwa ajili ya utekelezaji wa elimu bure,  katika maelekezo ya fedha hizo za Rais Magufuli, hakuna maelekezo yanayowataka kuwahudumia wanafunzi wa kutwa chakula.

322 MBOZI WAKOSA MADARASA

Jumla ya wanafunzi 322 wa shule nne za sekondari waliochaguliwa kujiunga na kidato cha kwanza mwaka huu katika Wilaya ya Mbozi mkoani Mbeya, hawataanza masomo na wenzao kufuatia shule zao kukosa vyumba vya madarasa.

Ofisa Elimu Sekondari Wilaya yai Mbozi, Honsana Nshullo, alisema majina ya wanafunzi hao yamefichwa, mpaka pale wananchi watakapomaliza ujenzi wa vyumba vya madarasa ndipo yatakapotolewa, ili waanze masomo na kuwataka madiwani katika maeneo husika kuharakisha ukamilishaji wa vyumba hivyo mapema ili wanafunzi hao waanze masomo haraka baada ya kufanya usaili wa pili.

Alizitaja shule hizo na idadi ya wanafunzi kuwa ni pamoja na Kilimampimbi wanafunzi 40 (chumba kimoja cha darasa kinahitajika), Nalyelye wanafunzi 88 (vyumba viwili vya madarasa), Mlowo wanafunzi 64 (vyumba viwili vya madarasa) na Insani wanafunzi 88 (vyumba viwili) na kwamba katika shule hii hakuna mwanafunzi hata mmoja aliyechukuliwa.

Aidha, Nshullo alisema pamoja na kwamba serikali imefuta ada na michango mingine kwa wanafunzi lakini wazazi watakuwa na wajibu wa kuhakikisha watoto wanapata chakula cha mchana na mahitaji mengine kama vile sare, daftari na kalamu.

Manispaa ya Dodoma

Uongozi wa Shule ya Sekondari Mbabala iliyopo Manispaa ya Dodoma, umedaiwa kutoza Sh. 500,000 kwa mwaka kwa kila mwanafunzi anayelala shuleni (boarding).

Akizungumza na Nipashe, Mkuu wa shule hiyo, Gaitan Mwatenga, alikiri shule kutoza fedha hizo na kudai shule hiyo si ya bweni bali ina hosteli kwa wazazi wanaotaka watoto wakae shuleni hulipa fedha hizo.

Alisema kiasi cha Sh. 250,000 hutozwa kwa kila mwanafunzi anayekaa hosteli kwa muhula na kwa mwaka mzazi anatakiwa kulipa Sh. 500,000.

“Mimi sina bweni hapa, nina hosteli na shule zenye hosteli kwa hapa Manispaa ya Dodoma ni Mbabala, Mpunguzi na Hombolo yaani huwa kuna nafasi kidogo za hosteli kwa yule anayetaka kuja kukaa anakuja lakini anatakiwa kutoa fedha hizo kwa ajili ya gharama ya chakula, wapishi, matroni, kuni na vitu vingine,”alisema mkuu huyo na kufafanua kuwa bodi ya shule ndiyo iliyopanga kiwango hicho ambacho ni sawa na mwanafunzi kutumia Sh.1,500 kwa siku.

Akifafanua suala hilo, Afisa Elimu mkoani hapa, Juma Kaponda, alikiri shule hiyo kutoza fedha hizo na kudai kuwa ni kwa ajili ya hosteli sio bweni.

Alisema kinachozungumzwa kwenye elimu bure ni kwa maana ya gharama za  uendeshaji na si bure kwa maana ya gharama za mtoto.

Mwamko hafifu simiyu

Katika Shule ya Sekondari Simiyu, iliyoko Kata ya Malambo, Halmashauri ya Mji wa Bariadi, hadi juzi hakukuwapo mwanafunzi yeyote ambaye alifika kwa ajili ya kujiandikisha kuanza kidato cha kwanza.

Mmmoja wa walimu wa shule hiyo ambaye hakutaka kutajwa jina lake kwa madai kuwa si msemaji wa shule, alisema hakukuwa na mwanafunzi yeyote ambaye amerejesha fomu zilizochukuliwa kwa ajili ya kujiunga na masomo shuleni hapo.

“Shule hii inatakiwa kupokea wanafunzi 220 na ambao wamechukua fomu mpaka sasa ni zaidi ya 100,  lakini hadi leo (juzi) hakuna hata mmoja ambaye amerejesha fomu kwani mimi ndiye napokea fomu hizo,” alisema.

Pia katika Shule ya Sekondari Kidinda, kata ya Bariadi, Mwalimu Mkuu wa shule hiyo, Shija Mayunga, alisema wamepokea wanafunzi watatu tu ambao alisema walifika na fomu pamoja na mahitaji muhimu kwa ajili ya kuanza masomo.

“Mwitikio bado mdogo sana mpaka sasa tumepokea wanafunzi watatu tu na hapa hatuoni dalili za kupokea wanafunzi wengine lakini tuna matumaini hadi kufika mwishoni mwa wiki hii wanafunzi wanaweza kuongezeka,” alisema.

Mayunga alisema shule hiyo inatakiwa kupokea wanafunzi 253 na kuonyesha kushangazwa na wazazi kushindwa kuwapeleka wanafunzi shule wakati serikali imetangaza elimu bure kuanzia chekechea hadi kidato cha nne.

Katika Shule ya Sekondari Biashara, kata ya Sima, Mwalimu Mkuu wa shule hiyo, Mathias Joseph, alisema hadi juzi saa 6:40 mchana walikuwa wamepokea wanafunzi 29 kati ya 337 wanaotakiwa kuripoti shuleni hapo kuanza kidato cha kwanza.

Alisema mwitikio wa wazazi kupeleka wanafunzi shule ni mdogo ikilinganishwa na matarajio yao baada ya serikali kuondoa michango ikiwamo ada.

Mwongozo wa elimu Bure

Mwongozo wa elimu bure uliotolewa na Wizara ya Elimu, Sayansi, Teknolojia na Ufundi, elimu msingi bila malipo, serikali ilikuwa igharamikie utayarishaji na uendeshaji wa mitihani ya kitaifa, uthibiti ubora wa shule, ruzuku ya uendeshaji wa shule ikiwamo ulinzi, umeme, maji na ununuzi wa chaki na karatasi pamoja na vifaa vingine vya kufundishia na kujifunzia.

Serikali pia itagharamikia kununua vitabu, kemikali na vifaa vya maabara, samani yakiwamo madawati, vifaa vya michezo, matengenezo ya mashine na mitambo pamoja na kujenga na kukarabati miundombinu ya shule.

Majukumu ya wazazi 

Kwa mujibu wa mwongozo huo, wazazi wanatakiwa  kununua sare za shule na michezo, vifaa vya kujifunzia vikiwamo madaftari na kalamu, chakula kwa wanafunzi wa kutwa na kugharamia matibabu kwa watoto wao.

Imeandaliwa na Anceth Nyahore, Simiyu, Bosco Nyambege, Mbozi, Stevie Chindiye, Tunduru na Augusta Njoji, Dodoma

CHANZO: NIPASHE