Jitihada za Serikali kutunza na kuendeleza vyanzo
vya maji katika bonde la mto Ruvuma na pwani ya kusini ili kuboresha
huduma
ya maji huenda zikatatizwa na mgongano wa sheria na sera
ya misitu, kilimo, ardhi na ile ya maji.
Uchunguzi uliofanywa na mwandishi wa habari hizi mkoani
Ruvuma umebaini kuwa wananchi wanaoishi karibu na vyanzo vya maji hawaelewi
sheria za uhifadhi ardhi na sera mbalimbali ikiwepo kilimo kwanza pamoja na
ile ya wizara ya maji inayozuia kuendesha shughuli za kibinadamu kwenye
mabonde na vyanzo vya maji.
Baadhi ya wakulima wa
mbogamboga katika bonde la mto ruvuma,matogoro mjini Songea, wamesema
wanashangazwa na
baadhi ya viongozi
kuzuia shughuli za kilimo katika bonde hilo wakati serikali ikihimiza
wakulima kujikita zaidi ktk kilimo cha umwagiliaji.
Wamesisitiza kuwa sheria ya mazingira inayowabana
kutokufanya shughuli zozote za kibinadamu ndani ya mita 60 ili kutunza vyanzo
vya maji inakwamisha utekelezaji wa sera ya kilimo kwanza hatua ambayo wamedai
itaongeza umasikini kwa jamii inayotegemea kilimo cha mabondeni.
Ofisa uhusiano
wa bonde la mto Ruvuma na pwani ya kusini bw.Dickson Maganga amesema ofisi yake
inatambua changamoto ya mgongano wa sera na sheria katika kuhifadhi
rasilimali ya maji ndio maana wameanzisha mpango shirikishi wa kutunza na
kuendeleza rasilimali hiyo kwa kuunda jumuiya za watumia maji katika
mitaa ili kusaidia kueneza elimu ya umuhimu wa utunzaji wa vyanzo na mabonde ya
mito katika eneo hilo.
Wakati serikali
ikitekeleza miradi mbalimbali ya maji bado kumekuwepo na tatizo la upatikanaji
wa maji safi na salama katika maeneo mengi nchini hali inayosababishwa na
mabadilko ya tabia nchi pamoja na shughuli za kiuchumi zinazofanyika
katika vyanzo vya maji zikiwepo kilimo,uchomaji
wa mkaa na
matofali,ufugaji na upasuaji wa mbao.
0 comments:
Post a Comment