MFUKO wa Taifa wa Bima ya Afya (NHIF) amewataka wajasiriamali mkoani
Ruvuma kuchangamkia mpango maalumu wa matibabu wa Kikoa waweze
kuhudumiwa kwa gharama ya Sh 90,000 kwa mwaka.
Ofisa Mwandamizi wa mfuko huo mkoani Ruvuma, Calytus Mpangala
aliwaambia wajasiriamali kutumia fursa hiyo adimu iliyotolewa na
serikali kupitia NHIF wawe na uhakika wa kupata huduma bora za matibabu
bila kutumia fedha ya mfukoni.
Mpangala alikuwa akizungumza na wateja wa Benki ya Wananchi Mbinga
(MCB) katika Wilaya ya Nyasa waliojiunga katika vikundi vya
ujasiriamali.
Alisema NHIF inahamasisha wananchi waliopo katika vikundi maalumu vya
kiuchumi kama vile vikundi vya kilimo, mama lishe, migahawa na
vinginevyo kuchangia Sh 96,000 ambayo Sh 78,600 inakwenda bima ya afya.
Zilizobaki ni kwa ajili ya shughuli za uendeshaji, riba na gharama za wafuatiliaji ambao ni MCB ambao ni mawakala wa NHIF.
Mpangala alisema, kiasi hicho cha fedha kitamwezesha mwana kikundi
kupata matibabu kuanzia kwenye zahanati, vituo vya afya, hospitali za
wilaya na mkoa na hata hospitali ya rufaa popote nchini pale mwanachama
wa mfuko huo atakapohitaji kutibiwa, isipokuwa baadhi ya gharama kama
usafiri, malazi na chakula zitakuwa za mwanachama mwenyewe.
Chanzo Gazeti la Habari leo
0 comments:
Post a Comment